Սննդամթերքի անվտանգության տեսչական մարմնի ղեկավարի որոշմամբ՝ կասեցվել է «Արզնի կաթնամթերք» սահմանափակ պատասխանատվությամբ ընկերությանը պատկանող կաթի և կաթնամթերքի արտադրամասի արտադրական գործունեությունը (ք․Երևան, Նոր Նորք):

Արտադրամասում հայտնաբերվել են սանիտարահիգիենիկ նորմերի խախտումներ, որոնք անհամատեղելի են սննդամթերքի արտադրության հետ, մասնավորապես՝

- արտադրամասի և պահեստային հատվածի պատերի, հատակի մակերևույթի որոշ հատվածներ պատրաստված չեն եղել անջրանցիկ, լվացվող, ախտահանվող նյութերից, ունեցել են վնասված  հատվածներ,
- առաստաղը եղել է վնասված, ինչը չի կանխարգելել կեղտի կուտակումը, մասնիկների թափվելու վտանգը,
- բացվող ներքին պատուհանը և օդահեռացման համակարգի կողային հատվածները չեն ունեցել  միջատապաշտպան պաշտպանիչ ցանցեր,
- կոյուղու համակարգի մի հատված նախագծված չի եղել այնպես, որպեսզի բացառվի սննդամթերքի աղտոտման ռիսկը,
- սննդի կառույցն ապահովված չի եղել անձնակազմի համար նախատեսված հանդերձարանով,
- սննդամթերքի հետ անմիջական շփման մեջ գտնվող բեռնարկղերը չեն ենթարկվել պատշաճ մաքրման և ախտահանման։

«Արզնի կաթնամթերք» ընկերության տնօրենին հանձնարարվել է ձեռնարկել անհրաժեշտ միջոցներ՝ կաթի և կաթնամթերքի արտադրամասը համապատասխանեցնելու իրավական ակտերով սահմանված նորմերին:

Խախտումները վերացնելու համար սահմանվել է վերջնաժամկետ: